Композитор

Композитор һәм аранжировкасы Ильяс Камал 2011 йылда Ҡазан музыка колледжын тамамлай, уҡыу йылдарында музыка ижад итә башлай, төрлө ансамблдәр өсөн эшкәртмәләр яһай, Ҡазан дәүләт консерваторияһы профессоры, билдәле композитор Борис Трубиндан дәрестәр ала.

2016 йылда Ҡазан дәүләт консерваторияһын профессор Альберт Әсәдуллиндың виолончель класы буйынса, профессор Борис Трубин һәм доцент Виталий Харисовтың композиция класы буйынса тамамлай.

2017 йылдан башлап Ильяс Камал Рәсәй Федерацияһының һәм Татарстан Республикаһының композиторҙар берлектәре составтарына инде.

2019 йылда Ҡазан дәүләт консерваторияһының ассистентура-стажировкаһын тамамлай, ижади етәксеһе — Татарстандың атҡаҙанған сәнғәт эшмәкәре Виталий Харисов, шулай уҡ опера-симфоник дирижёрлыҡ буйынса Айҙар Яруллин класында уҡып сыға.

2024 йылдың декабренән — Татарстан Республикаһы композиторҙар берлеге рәйесе.

ИЖАДЫ

Ильяс Камалдың ижадының иң ҙур өлөшөн камера-инструменталь һәм оркестр өсөн әҫәрҙәр, опера һәм театр музыкаһы тәшкил итә. Авторҙың музыкаль стилен татар һәм башҡа төрки халыҡтар традицияларына таяныу һәм яңы заман композиторлыҡ техникаһын ҡулланыу тәшкил итә. Ильяс Камалдың әҫәрҙәре Рәсәй Федерацияһының күп ҡалаларында, Татарстан, Башҡортостан, Тыва, Адыгея республикаларында, Ҡытай, Ҡаҙағстан, Төркиә, Финляндия, Голландия, Перу һәм Чили илдәрендә башҡарылып уңыш ҡаҙана.

Төп әҫәрҙәре:

«Минем Такташ» операһы, Рүзәл Мөхәммәтшин либреттоһы (2019)

«Урал бөркөттәре» операһы, Салават Камал либреттоһы (башҡорт телендә) (2024)

Илһам Шакировҡа бағышланған «Ҡарурман аша» симфоник поэмаһы (2019)

Симфоник оркестр өсөн «Төрки сюита» (2025)

Камера оркестры өсөн «Ҡыпсаҡ увертюраһы» (2016), симфоник оркестр өсөн редакция (2024)

Ҡыллы оркестр өсөн «Поэма-элегия» (2020)

Виолончель һәм симфоник оркестр өсөн концерт (2016)

Альт-саксофон һәм симфоник оркестр өсөн поэма (2011)

Симфоник оркестр өсөн «Байрам рондоһы» (2012)

«Һаҡ-Соҡ ҡанаттарының сере» исемле балалар өсөн мюзикл (2016)

Фортепиано өсөн соната (2013)